Қытайда түсініксіз құбылыс болды: Үрейі ұшқан адамдар жан сауғалап қаша бастаған
Главные вкладки
Қытайдың Шэньчжэнь қаласындағы SEG Plaza сауда орталығының ғимараты кенеттен қозғалып, теңселе бастады. Үрейі ұшқан қызметкерлер мен сатып алушылар қауіпсіз жерге жүгірді деп жазады Sputnik Қазақстан.
Басылым мәліметінше, биіктігі 300 метрлік көп қабатты ғимарат Қытайдағы ең биік ғимараттардың бірі. Әлеуметтік желіде жарық көрген видеодан адамдардың биік ғимараттан жүгіріп шығып жатқанын байқау қиын емес. Барлық адамды эвакуациялауға бір сағаттан астам уақыт кеткені белгілі болды. Қазіргі уақытта сауда орталығының теңселуіне не себеп болғаны белгісіз.
"Шаһардағы жер сілкінісін бақылау станцияларының мәліметі тексеріліп, талданғаннан кейін сейсенбі күні Шэньчжэньде ешқандай жерасты дүмпуі болмағаны анықталды", - делінген хабарламада.
Сарапшылар ғимараттың негізгі конструкциясында немесе сыртында қауіпсіздік ережелері бұзылмағанын, ал ішкі және сыртқы компоненттері бүтін екенін анықтаған.
Айта кетейік, SEG Plaza сауда орталығы 72 қабаттан тұрады, онда электроника дүкендері мен мейрамханалар орналасқан. Зәулім ғимараттың 50-68 қабаттары – "көктегі қонақ үй". Ғимаратта айналаны шолу алаңы да бар.
