Елімізде жер телімін алу жеңілдейді
Primary tabs
Мәжіліс депутаттары 26 қазанда кейбір заңнамалық актілерге бірыңғай мемлекеттік жылжымайтын мүлік кадастры аясында мемлекеттік қызметтерді цифрландыру мәселелері бойынша түзетулерді бірінші оқылымда мақұлдады, деп хабарлайды kaskelen.kz тілшісі Zakon.kz ақпараттық порталына сілтеме жасап.
Заң жобасы халық пен бизнестің жер қоры мен жылжымайтын мүлік туралы ақпаратқа ашықтығын және толық қолжетімділігін қамтамасыз ету мақсатында әзірленген.
"Қолданыстағы схемаға сәйкес жер қатынастары саласындағы қызметтерді көрсету процесіне жер, құқықтық, қала құрылысы кадастрларының ақпараттық жүйелері, мекенжай тізілімі, сондай-ақ жергілікті атқарушы органдардың ақпараттық жүйелері тартылады. Сонымен бірге ақпараттың бөлшектенуі және ақпараттық жүйелер арасындағы өзара әрекеттестіктің жоқтығы күтілген нәтижелерді бере алмады.", - деп мәлімдеді ҚР Цифрлық даму, инновациялар және аэроғарыш өнеркәсібі вице-министрі Әсет Тұрысов.
Оның айтуынша, тегін жер телімдері туралы ақпараттың жоқтығы жергілікті атқарушы органдарға әртүрлі себептерді: бас жоспардың, ЖЖҚ, инженерлік желілердің және т.б. жоқтығын алға тартып, азаматтарға жер учаскесіне құқық беруден ресми түрде бас тартуға мүмкіндік береді.
"Халықтың барлық топтарының алып жатқан немесе бос жатқан жер учаскелері, тіркелген жылжымайтын мүлік объектілері, инфрақұрылымдар туралы ақпаратқа тең және толық қолжетімділігін қамтамасыз ету мақсатында Бірыңғай мемлекеттік жылжымайтын мүлік кадастрының ақпараттық жүйесі әзірленді. Жаңадан құрылған ақпараттық жүйе жер-құқықтық кадастрлардың мәліметтерін біріктіреді, оларға қолжетімділік қоғамдық кадастрлық карта арқылы жүзеге асырылады." - деп қоса кетті,
Қоғамдық картаның жұмыс істеуі, толтырылуы және қолданылуы уәкілетті органдармен келісім бойынша министрлік бекітетін жекелеген ережелермен реттелетін болады.
