Территория правды

Қарағанды облысында вакцина салдырған зейнеткерлерге ақшалай сертификаттар берілуде деп хабарлайды ҚазАқпарат.

Қарағанды облысының кәсіпкерлері мен қоғамдық қорлары "Коронавирусты бірге жеңеміз!" атты акция жүргізуде. Балқаштың вакцина салдырған зейнеткерлеріне және Ұлытау ауданының тұрғындарына ақшалай сертификаттар беріледі.

Ол сертификаттарға азық-түлік сатып алуға немесе коммуналдық қызметтерді төлеуге болады. Аталмыш өңірде акцияның бастамашылары жергілікті кәсіпкерлер болды. Олар ақшалай қаражат бөліп, азық-түлік дүкендер желісімен, сондай-ақ зейнеткерлердің сертификаттарын қабылдайтын қаланың коммуналдық кәсіпорындарымен келісті.

"Сертификаттар вакцинаның бірінші компонентін алғаннан кейін бірден егу пунктерінде беріледі. Олар жалғызбасты зейнеткерлерге және ең төменгі зейнетақысы бар адамдарға арналған. Сондай-ақ, оларды "қант диабеті" диагнозымен диспансерлік есепте тұрған қарт адамдар алады. Біз тәуекел тобына жататын егде жастағы адамдарды вакциналауға ынталандыру үшін осындай акцияны бастадық", – деп атап өтті Балқаш қаласы әкімдігінің ішкі саясат бөлімінен. 

Ұлытау ауданында "Арша Фаранд" қоғамдық қорының бастамасымен вакциналанған азаматтарға ақшалай сертификаттар беру басталды. 5 мың теңге сомасындағы сертификаттар 65 жастан асқан вакциналанған аудан тұрғындарына және көпбалалы отбасыларға беріледі.