Алматыда қарттар үйінде 2 адам коронавирустан көз жұмды: Дәрігерлер жағдайды түсіндірді
Primary tabs
Алматыдағы қарттар үйінде екі ер адам коронавирустан көз жұмды. Тағы бір әйел жұқпалы аурулар стационарында жатыр. Қалалық денсаулық сақтау басқармасы бұл жағдайға қатысты пікір білдірді деп хабарлайды ҚазАқпарат.
Басқарма таратқан мәліметке сәйкес, COVID-19-дан көз жұмғандар "Шаңырақ" әлеуметтік қызметтер орталығында тұрады. Сонымен қатар, олар жасы бойынша "ардагерлер" санатына жатпайды.
"1945 жылы туған Азамат Хамитов 16 сәуірде "Шаңырақ" әлеуметтік орталығынан Жекенов атындағы қалалық клиникалық жұқпалы аурулар ауруханасына өте ауыр жағдайда түсті. Ал 1953 жылы туған екінші азамат 15 сәуір күні Орталық қалалық клиникалық ауруханаға туыстарының үйінен ауыр жағдайда жеткізілді.
"Шаңырақ" орталығының үшінші тұрғыны 1947 жылы туған Ж. есімді азаматша Орталық қалалық клиникалық ауруханада ем қабылдап жатыр. Оның жағдайы орташа ауырлықта", - деп хабарлады басқармадан.
Өз кезегінде №7 қалалық клиникалық аурухананың әкімшілігі марқұмдардың бірі осы медициналық мекемеде коронавирус жұқтырды деген ақпаратты жоққа шығарды.
"1953 жылы туған А. есімді науқас Алматы қаласы №7 қалалық клиникалық ауруханасының №1 инсульт бөлімінде 2021 жылдың 26 наурызы мен 5 сәуірі аралығында жатты. №7 ауруханада емделу кезеңінде науқаста коронавирус инфекциясының белгілері болған жоқ. КВИ-ге тапсырған ПТР анализі теріс болды.
Бөлім жағдайында қажетті медициналық көмектің толық көлемі денсаулық сақтау министрлігінің хаттамалары бойынша жүзеге асырылды. Денсаулығының жақсаруына байланысты ауруханадан шығарылды. Кейбір адамдардың пациенттің "ауруханада коронавирус жұқтырды" деген мәлімдемесі негізсіз деп санаймыз", - деп атап өтті №7 қалалық клиникалық аурухана әкімшілігі.
