Орталық көшелерге шырша отырғызды
Primary tabs
Негізі аудан орталығын абаттандыру мақсатында жыл сайын бірқатар жұмыстар қолға алынады. Соның бірі – орталық көшелердің бойына ағаштар отырғызу. Дегенмен, егілген көшеттерге тиісті деңгейде қамқорлық көрсетілмей, олардың жарамсыз болып қалып жататынын көзіміз көріп жүр. Яғни, бұл аталған бағытта бөлінген қаражаттың желге ұшқанын айғақтап тұрған жоқ па?
Қалай десек те, биыл бұл жұмыс қайта қолға алынды. Айтпағымыз, қазіргі таңда Қаскелең қаласындағы Абылайхан және Наурызбай батыр көшелерінің жиегіне қаз-қатар шыршалар тігілуде. Ол үшін алдымен былтыр егіліп, бірақ қурап қалғандары қайта қазылып алынған.
Ресми мәліметтерге сүйенсек, бұл ағаштарды жақсылап қарап, өсіруді арнайы мердігер мекеме өз мойнына алған. Сонымен қатар, Қаскелең қаласының жақында тағайындалған әкімі Асқар Мұқашев та көшеттердің көркейе түсуіне тиісті көңіл бөлетіндігін жеткізген. Демек, осы жолғы науқанның нәтижелі боларына сенім мол.
